Јулска среда, неработна. Добар штимунг. Дотеран спој од звуци. Итав до парк, среќен што конечно, по карантинските паузи ќе си го нахранам апетитот со нова, инспиративна средба. На клупата од десно, спроти фонтаната, ја сретнав, Јована. Во „all black“ комбинација, со поглед кој оцртува смиреност, длабочина, но во исто време разиграност, жар што не мирува, туку постојано е – во движење. Набрзо потоа дознав дека тоа ѝ е всушност клучниот елемент во животот. И си го има врежано засекогаш, на левата рака. „Тетоважава е прилично нова. Ова е надреализам. Дел од триптих. Хуан Миро. Филозофијата му е движењето, во космосот, во празнината. Пред месец дена ја ставив. Иако ми е желба од последниве десет години“, ми објасни. Неколку сантиметри подолу, уште еден детаљ што би рекол дека е константа во нејзиниот стил. Часовник. „Часовниците ми се потсетник на нешто убаво што ми се случило, а и потсетник колку е саат. :) “. Саатот откуцуваше, а уживав во секоја минута со неа. Муабетот ни се разврза од нејзината поврзаност со уметноста уште од мали нозе. Не случајно кај неа се компресирала толку креативна енергија од различни културни сфери. „И мајка ми и татко ми се занимаваат со уметност. Татко ми беше режисер на документарни филмови, така што со него веројатно се разви љубовта и кон фотографија. Уште од дете сум со апарати и камери, поголеми од мене. А пак мајка го има завршено истото што и јас, Историја на уметност со археологија. Исто така од дете пракса ми беше да одам на изложби“. Ви спомнав и дека е туристички водич? Си „ископав“ еден драгоцен камен, ви велам јас. Нејзиниот стил рефлектира минимализам. Пред сè удобност и хм, лежерност. А „зачинот“ се детаљите. И ќе се уверите дека комплиментот „Looking good!“ од рандом дечко на улица не бил туку така кажан. Ретко ќе ја видите во фустан, и тоа не во класична комбинација со потпетици туку одлично склопена со патики, и кај неа изгледа супер шик. Недвојбено, облеката е уште еден медиум за изразување. „Мислам дека преку начинот на облекување може да се емитираат нечии пораки, расположение. Секогаш се радувам кога добро облечена личност е и добро воспитана и културна. Тоа е добитната комбинација за убав впечаток“. Наполно се согласувам, драга моја Јована.

Spread the love
  •  
  •  
  •  
  •   
  •   
  •   

Leave a Reply