Кога зборуваме за новинари со професионална одговорност, умешни, елоквентни, остроумни, ведри и препознатливи, Ана е на врвот од списокот. Сигурно ја паметите по нејзината авторска, култна ТВ емисија за Скопје и проблемите на скопјани, „Врти сучи тоа ти е Скопје“ од која направи препознатлив бренд. Или пак сте присуствувале на некој важен настан или јавна трибина каде што таа била промоторка каде што повторно, беспрекорно, со бистра мисла која тече преку најсоодветна селекција на зборови и чиста дикција и соодветен стил, ќе потврди дека е ретка „новинарска фаца“, со добар мисловен дух. По сплет на околностите, имав можност да бидам дел од една таква трибина и да посведочам директно за тоа како таа „владее“ и ја води ситуацијата на исклучително, врвно ниво, а во исто време атмосферата е толку пријатна, и она што веднаш допира до вас е позитивната вибрација (и прекрасната насмевка) што таа ја пренесува, па се чувствувате како да си правите опуштен и инспиративен разговор. „Новинарството не е професија со работно време, тоа е начин на живот. Сè што сум работела, сум го живеела.“, ќе рече.

Со својот концизен и прониклив јазичен стил, таа отвора и поддржува разни културолошки и општествено важни прашања со цел да ги предизвика стегите и девијациите на општественото, родово и културно живеење кај нас, како своевидна современа хероина која постојано поттикнува да се зачува човештината, чесноста, убавината како противтежа на хаосот во кој живееме и напливот од таблоидни вести. И за да не зазвучи ова ескапистички, таа исто така директно се вклучува во граѓански акции. Верува во можноста секој од нас со свој влог да го направи светот подобар за себе и за другите. „Во ера на самољубие, претенциозност и уверување дека сè може да се купи, јас верувам само во искрената љубов и само таа е лекот за сè. И затоа не ме изненадува што таа ги заобиколува алчните и “трговците’ на чувства. Љубовта и нејзините форми на почитување, сочувство, споделување, давање, грижа, солидарност… е тоа е нормално.“

Ана сигурно сте ја забележале или сретнале и низ град, во Дебар Маало, додека го пие омилениот Southern Comfort во „Синдикат“, нејзиниот втор дом, како што вели. Нејзиниот невербален јазик го пренесува преку облеката и стилот што силно рефлектира женственост од една страна и бунтовност од друга, потоа автентичност и отменост. Со впечатлив накит што често го купува од местата каде што патува, добра и квалитетна чевла, „јака“ чанта. Но, таа не е заробеник на модата, прави свесен избор за парчињата и важи за голем поддржувач на нашите локални дизајнерски имиња. Таа е релевантен градски лик кој дава шарм и на својот моден свет полн естетика и емоција. Неминовно, Ана остава траен белег на урбаната мапа кај нас.

Spread the love
  •  
  •  
  •  
  •   
  •   
  •   

Leave a Reply