Загатка

Првото кафе со цигара ми е најслатко. Кога немам обврски така си уживам најмалку саат време. Потоа со кучето еден круг низ маало... ако немам некоја посебна работа и ако е сончево, без мислење, одам на кафе до Љубов да се доопуштам :)

Кога имам обврски пак, секој ден ми е нов предизвик и гледам да завршам сè што можам, во рекордно време. Секогаш прво правам план според тоа што ми е приоритет и се вадам од такт кога ќе ми улета нешто друго и ќе ми направи хаос.

Во зависност од тоа каде одам го одбирам она што ќе го носам. Ако во денот излезам 5 пати, ќе сменам најмалку 4 аутфити. Често знам да седам и пола саат пред плакар, да се мислам што да облечам, па ќе се пресоблечам едно 4 пати дури не го најдам тоа што сакам...

Најчесто сум во фармерки и патики. Мене да ми е удобно, да е широко. Секогаш гледам тоа што го носам да е еден број поголемо на мене. Преку ден сакам да се осеќам опуштено, но и убаво во тоа што сум облечена, а за вечерно излегување знам и да се „скоцкам“ од глава до пети ама сето тоа да биде во мој стил.

Модата и музиката може да се каже дека се во доста тесна врска. Најчесто во тинејџерските години тоа е поизразено. И низ текот на времето, дооформувајќи си го стилот, музиката што ја слушам има големо влијание. „Заразена“ сум со некои постари бендови како Pulp, Modern English, The cure итн. Во последно време по дома се слуша фанки. Или ќе начекаме некоја плејлиста на Јутјуб и си „врти“. „Гранџ“ стилот сум го носела отсекогаш во себе. Изминатиов период е и доста модерен така што најчесто сум во таа „форма“.

Патикиве си ги зедов годинава од Бата и тоа брзо-брзо да не ми се продадат па да останам без нив. Прво имав бендисано едни слични од Zara,но како и секогаш, сè што ќе видам и ќе ме бендиса на нет кај нас го нема или го добиваат после 2 месеци. Па така си ги најдов овие и сум среќна што не ги чекав првите, зашто овие ми е 100 пати поудобни и поубави. :P

И да врне и да вее јас носам наочари :) Наочари ми се фетиш. Ги имам во голем број и ги носам во зависност од тоа со што ми одговараат. Oвие и уште едни Ray Ban-ки ми се класика и ми одат со сè.

Летово треба да спремам и магистерска и ме фаќа паника :) Се смеевме со професорот, од лани до сега ми поминаа 100 идеи низ глава и конечно се одлучив. Ќе бидат double exposure фотографии на кои ќе има портрет и преку него залепена друга фотографија од пејзаж. Не можев да се одлучам меѓу тема портрети и пејзажи, па решив да ги спојам во едно. Нормално сето тоа ќе има приказна. Ќе фотографирам во Охрид на локации што ќе бидат некако поврзани со ликовите. Здравје, кога сè ќе е готово ќе ви кажам да дојдете на изложба :)

Сите парчиња кои ги имам се „јас" :) И кога некој друг ми купува знае што би носела и секогаш ми викаат „Кога го видов ова ми текна на тебе". Така што сите кои ме познаваат, знаат што носам и кој е мојот стил.

Можам да го одвојам блогот на Maffashion од полската блогерка Julietta.Ми се допаѓа нејзиниот стил и ги следам нејзините постови на ФБ и на официјалниот блог сајт.Секогаш е добро скоцкана,било да станува збор за casual или по fancy варијанта, таа знае да го носи тоа што е на неа.

Tашничкава е на мајка ми но, јас малце си ја преправив во стилот на Carrie Bradshaw. Малецка е, а собира сè што ми е потребно и баш е женствена и шик. How to make: :) Одбираш неколку бои на лакови и ги нанесуваш на ташната како шкртаници. Ја оставаш надвор да се суши и, оп, имаш нова ташна за помалку од 2 сати :)

Моментално ми дојдоа многу работи наеднаш. Но, ако, нека има, што повеќе работа тоа поубаво :) Со дечко ми спремаме сајт за улична мода во Македонија. Ќе ловиме интересни аутфити низ улиците во Скопје, Охрид, Битола... и сето тоа преку фотографии ќе им го пренесуваме на љубителите на модата.

Идеи има насекаде околу нас. Тоа е исто како кога велиме „Ми летаа прашалници на сите страни" :) - Треба само да ги фатиме и да пробаме да ги реализираме. Некогаш треба и да се ризикува за да се успее. Не често, но имам и луди идеи за кои, кога подобро ќе размислам, си се чудам како можело такво нешто да ми падне на памет. Ама кога размислуваш отворено и сестрано може сè да ти дојде на ум :)

Кропнатава маичка ја обожавам и најмногу ја носам, на сè што имам со висок струк, било на здолниште, фармерки, шорцеви... не сакам топ зашто се осеќам премногу голо.Овој модел е таман како за мене направен. Малце ѕирка стомаче и струкче и тоа е скроз доволно. Башка натписот "Artist" ме опишува баш мене.

Хекланото фустанче ми го купи баба ми во Србија. Таа обожава да ме облекува и да ми купува сè што сакам. И кога не сум таму сама знае што да ми одберe. Едноставно, си имам супер бабичка која е права дама во секој поглед и секогаш се грижи ништо да не ми недостасува.

Како помала цело време се шетав во широки панталони и бев баш преоблечено „детиште“. И мајка ми ќе ми речеше: „Кај одиш таква?!“, на гости кога одевме негде, „дај облечи се нормално.“ Потоа пораснав и си направив пресврт во стилот.

Кондуриве си ги купив лани за Нова година. Ги имам изнаносено зимe и лето. Ми одговараат на сè и баш ми се удобни.

Стил како стил во денешно време е многу тешко да се изгради целосно, барем за некои луѓе. Сите од некаде копираат и црпат идеи, ретко кој се осмелува да експериментира и да биде оригинален. Мразам копирање.

(Особено драго парче и зошто?) - Имам повеќе. :) Би ја издвоила кафената кожена јакна која е од младоста на мајка ми. Модата се враќа па така, сега, таквите парчиња се баш „ин".

Добра шопинг зделка, хммм... без разлика дали имам за да си дозволам добар шопинг или не, задоволството е исто. И кога ќе си купам едно парче кое знам дека вреди и ќе го изнаносам, исто му се радувам како на 10 работи купени истовремено. На секоја купена ситница се радувам како мало дете и никогаш не купувам колку само да купам. Го земам она што знам дека навистина ми треба.

Од мали нозе кога ќе се пронајдеме во нешто... го надоградуваме сопствениот стил и стануваме препознатливи по него.

Панталониве си ги купив летоска во Охрид. Омилени ми се за на лето зошто се широки и лесни. Инаку, купени се од Пренди и се само 250 денари. :) За мене немаат никаква врска марката и цената бидејќи дури и во продавниците што ги викаат „нискобуџетни" најчесто се наоѓаат многу убави парчиња за малку пари.

Сите шорцеви што ги имам ми се омилени и секогаш едвај чекам да се стопли за да можам да ги носам. Дефиниција за лето ми се „шорцот со маичка или со некоја кошула и старки“. Лабаво и убаво.

Секогаш кога можам гледам да скокнам до Охрид, да се видам со најблиските, да прошетам до Канео, да си ги наполнам „батериите“. Канео го сакам најмногу, мислам дека можам по цел ден таму да „дремам“.

Следам модни трендови но, гледам секогаш да го носам тоа што ме карактеризира мене и мојот личен стил. Некогаш можам нешто и да купам па да го редизајнирам во мој стил.

Ми коментираат сите, „уникат си“, не знам што... јас не се гледам многу многу како таква. Секој си е уникатен и посебен на свој начин.

Ова ми е омилената кошула. Ја облекувам секој пат кога не знам што да облечам. Многу често ја носам. :)

Мостови обожавам да сликам. Под мост, над мост. Ме влечат како мотив.

Имам едни штикли, само за во зимо. Не сакам многу да се влечкам по гужви, на штикли, поготово не летно време... можеби се зезнав со првите штикли што ги купив, беа 10-ка. Се симнував со нив од дома до чаршија па, можеби, саат време! Ме зезаа, „излези си по патики а, штиклите во ташна за да си ги облечеш кога ќе стигнеш во град, па на враќање ќе си ги земеш патиките...“ Никогаш порано не сум сакала штикли и секогаш сум била на рамно. Но, секако, со тек на време дојде и тој момент. Ги немам во голем број бидејќи ретко ги носам и тоа е најчесто за вечерно излегување. Прикладни ми се со сè што носам и скоро секогаш ги комбинирам со фармерки.

Со фотографија почнав да се занимавам од средно, но тогаш не беше ништо сериозно. Се трудев да фоткам со обичен „идиот" апарат и ми успеваше. За факултет конечно си купив професионален апарат кој ми е секогаш на десното рамо. Фотографијата е медиум за изразување и комуницирање. Таа треба да пренесува некаква порака и тоа да биде со голема доза на енергија и стил.

Инаку мрзам зима; се осеќам како мечка и ако немам обврски мислам дека можам да ја преспијам цела :)

И мразам кога ќе влезам некаде и кога ќе ме „измери“ некој од глава до пети. А такви ги има, многу.

Веќе 5 години живеам во Скопје но, Охрид ми е во срцево. Ми фали чистиот воздух, езерото, релаксираното живеење и куќата со поглед од милион долари :) Но, што е, тука е. Го сакам и Скопје...омилен ми е паркот.Обожавам да се шетам и да седнам со лименка пиво и друштво до езерце.

Јас сум застаната на 23 години. Летото некој ќе ме прашаше колку години имам и му викам 23! Не бе чекај, 24 имам, ваљда. А бе години, што врска има. Сите ти викаат: „Еее од 20 до 25 се најубавите години.“ Кога ќе наполниш 30 ти викаат тие се најубави, фактички сите се најубави. Од 50-60 те тешат после, најубави години се и тие.

Дефинитивно се изразуваме и преку стилот, и оставаме впечаток но, не секогаш тоа е пресудно. За жал има многу конзервативни луѓе, особено кај нас, кои нè оценуваат според надворешниот изглед. Сум била во таква ситуација и навистина е смешно кога некој ќе те праша „А со стилов твој, шо праиме?" Да, јас сум успеала да изградам сопствен препознатлив стил и тој е мој, личен, и не сакам да ми се мешаат во тоа :)