СОНЦЕ ВО ТАУРУС

- Хахаха, хороскоп. Астрологија. Ептен сум навлезена. Опседната сум. Во секој момент од денот имам желба да прочитам и научам нешто ново за хороскопските знаци, планетите и куќите. Куќите уште не ги знам ама за планетите знам скоро сè. Ме „влече“, и по малку се разбирам и гледам на натални карти. Онака, луѓе остануваат без збор, што не ги ни познавам.

Тетоважата на глуждот ми е од Мила, другарка ми, нејзин потпис. Оваа на ракава, Мичиќ ми ја правеше и има многу значење ама нема да кажам што. :) Ова е една од тетоважите што најтешко се цртаат затоа што е конусна. Сакам да се истетовирам цела, кога ќе имам плата минимум 1000 евра :) и кога ќе си ги исполнам сите желби што си ги имам во глава.

Слободното време го поминувам со пријателите низ скопските улици. Летно време возиме точаци и ги поминувамe сите ќошеви, сретнуваме нови луѓе и се дружиме.

Ташнава ми е подарок од Боте и од Маја Казакова од Солун, од Зара. Ми се јавија еден ден и ми рекоа: „Емче, каква ташна сакаш, црна или бордо?“ и одбрав бордо бидеќи веќе имам црна ташна. Многу ми е практична и ја носам секојдневно. Ја имам „уништено“, ја оставам во диско на коњопој доле, па се истураат пијачки врз неа... и се будам сабајлето, ташната цела во капки.

Наочариве се од Зара, од City Mall, и се многу добри бидејќи стаклото е многу квалитетно и тежат; сите мислат дека се некоја посебна „марка“.

Еден од омилените дизајни ми е последниот кој го работев со другар ми Васе, преку конкурс, за дизајн на амбалажа за слатко. Ќе го видите наскоро. Ќе го издвојам дизајнот кој го работев на работилницата во едно прекрасно италијанско гратче, Васто. Темата беше „Save the nature“. Имавме и изложба каде што јас и Тони Димитров пуштавме музика.

„Love“ маичкава ми е од Pull&Bear, и таа ми е подарок. Многу ме љубат луѓево. :)

Бидејќи сум бик во хороскоп, многу сакам рогови, општо сакам земјени знаци... и ланчево, привезокот, е исто од мајка ми. Го носам на отворени маици бидејќи на затворени не стои. :)

Тексасот јакна e нарочно пет броја поголема од мене. Љубам тексас и широки јакни. И таа исто е од Певекс, на Тopshop.

Чизмиве ми се од пред три години од Timberland. Mи ги купи Игор Џамбазов, бидејќи му го направив дизајнот на корицата за книгата „Прирачник за Анти Антиалкохоличари“ и сакаше нешто да ме почасти. Јас си ги одбрав, си ги носам нон-стоп. Не „умираат“, многу се квалитетни. Големо задоволство ми беше да ги дизајнирам последните две книги на Игор Џамбазов, кој ми е многу драг пријател.

За музика можам да напишам цела книга. Без музика не можам да живеам, се будам и заспивам со неа. Во диско одам да ја почувствувам музиката, да фатам ритам и без престан да играм. Тоа за мене е ослободување на душата, ширење на позитивна енергија и добри вибрации. Затоа и пуштам музика, сакам и да ја создавам. Електронската музика ми е пред сè, сакам „deep“ и психоделични звуци.

Алкиве во комплет се исто од мајка ми. Чисто сребро.

Барем јас расположението го изразувам преку облеката. Луѓето во градов се ретки кои оставаат таков впечаток. Не е само види слика, облечи нешто модерно. Треба и да го почувствуваш за да бидеш ти, ти.

Кабаницава ја купив периодот кога почна многу да врне годинава. Имаше повеќе видови, пајче, пингвин, жаба... јас го одбрав пајчето бидејќи другарките ме викаат „пиле“. Го носам заедно со чадор бидејќи не заштитува, три броја помало е. За деца е... нели. :)

Шушкавецот ми е од Будимпешта, од H&M. Бевме на екскурзија во трета година, и само тоа си го купив и си купив пои - топчиња во боја што се вртат. Тогаш слушав транс и бев во „филм“ дека ќе одам на журки и ќе вртам пои.

Оваа ташна не знам од каде е затоа што е на сестра ми ама и ја „крадам“ (два пати до сега!) Мислам дека е од City Mall. Многу е шизичка бидејќи можеш да ја носиш буквално со што сакаш, и на работа, на кафе и во град...

Фармеркиве се од татко ми, дваесет години стари, си ги скратив за да можам да ги носам како шорц и многу ги сакам.

Ланчево мислам дека е од AliExpress. Сестра ми нарачува, се „навлече“ ептен.

Многу сакам маслинеста боја. Зелениве шорцеви се на мајка ми; исто така се стари, некои 20 години. Ги носела како млада и многу ми се допаѓаат. Ги носам и со едни гумени црни чизми и многу добро стојат. Црна гумена чизма, овие и маичка и „шибаш“. Од мајка ми имам повеќе работи, кошули што се за искачање, цветни... „свашта“.

„Good vibes“ ми е од Pull&Bear од Бебо за роденден, оваа година. Многу ми е драг. Флаерчињата за забавите на Dj Зоки Бејбе исто така ми се секојдневие и ги изработувам со сета љубов како што тој ми ја дава истата секогаш.

Патикиве ми се од аутлетот од „Борис Трајковски“ , ги купив за да спортувам и почнав да си ги носам и за искачање бидејќи ми се допаѓаат дека се лилакови.

Розевава маица ми е последна купена маица, од пред месец дена, од „Певекс“. Си ја носам, сакам малку да направам „refresh“ на облеката што ја имам.

Бојата на блузонов e една од моите омилени - тиркиз дреч која стои совршено на исончано. Обожавам дуксери во нив се осеќам најкомотно. Тоа сум јас.

Tашнава е многу стара и не знаеме кој бренд e. Поклон и’ е на сестра ми исто, од најдобрата другарка.

Дуксерот со брковите ми е од Зара и ми е многу здосаден, не го носам веќе. :)

Многу ми е тешко да направам избор на мои омилени песни: 1.Звуците на природата; 2. Atma – „There is still Hope” 3. Movement – „Control” 4. Jingles – “Whyt noyz” - од сè по малце, ете.

Овие чизми си ги купив од првата плата, работев кај Адо, во „Panache“, резервирав шишања. Работев шест месеци, и нема човек што не ме прашал од кај ми се, на многу им се допаѓаат.

Следам мода преку Тumblr и Instagram. Обично се облекувам според моето расположение и мислам дека облеката ја изразува душата. Комбинирам ретро парчиња од мајка ми со ново-купени парчиња облека. Навлечена сум на улична мода. Сакам секогаш да сум комотна во тоа што го носам и нормално никогаш не облекувам нешто што не знам да го носам, а не го ни купувам. Сиена Милер засекогаш, а од нашиов град ќе ја издвојам Елена Узуновски од Излет и Катарина Ивановска, нашиот топ модел. :)

Ташнава со орел ми е од Берлин. Ми ја има подарено колешка на мајка ми. Сакам да живеам во Берлин и да се занимавам со уметност. Да станам некој познат музички артист, да ги забавувам луѓето во јавни локали со мојата музика, да ги правам среќни. Ако не, би отишла на Тајланд и би ловела риба, би живеела гола во природа. Скопје ми фали и кога ќе отидам до Грчка. Го сакам и ќе ми фали буквално сè. Се надевам дека ние, новите генерации, ќе го направиме место за подобро живеење.

Капчето ми е поклон од ДЈ Мачки. Еден ден баравме поклони за роденден на негови двајца драги луѓе и за да не бидам запоставена си го одбрав капчево од Quicksilver. И често ги посетувам тие некои мали збутани продавнички како што е Pewex. Од таму ми е бордо блузонов кој е супер за на планина во ладните зимски денови. Не ми е важен брендот и цената на облеката. Сакам да купувам сè што ми прилега и што прави да се чувствувам убаво.

Фармерките H&M ми се поклон од Kамка Tоциновски. Mи се појави еден ден во Ciseux фризерскотo студио во кое работев мал период, пред две години. И биле мали и ми рече „Емче, повели, знам дека сакаш искинати фармерки“ и еве, уште ги носам, заљубена сум во нив. Фала ти Камка!

Ете ги духовите... :) Блузава ми е од Војдан, организатор на Ian Pooley забавата, му правев постер и како награда ми купи мрежаста блуза.

Отсекогаш ме влечела уметноста и сум сакала некако, визуелно да се изразувам. Дедо ми е ликовен уметник кој има и рачно изработувано логоа пред да се појават компјутерите. Со него секогаш цртав и со линијари од геометриски тела создавав луѓе и предмети. Најверојатно од таму потекнува желбата за тоа што го работам моментално. Овде сум се потпишувала, детството мое...

Маичкава кога ја видов знаев дека е за мене и дизајнот ме освои. Ја купив од Зара и одлична е за на плажа.

Штикливе се од „Манго“. Ова е мојата втора купена штикла. Не купувам често затоа што во Скопје нема добри штикли. :)

Мислам дека сите тие што знаат да ја носат облеката и добро им стои истата, се изразуваат преку неа вистински. Кога некој визуелно ти го привлекува вниманието знаеш дека тоа е тоа.